Орхон аймгийн ИТХ-ын Зөвлөлийн хуралдаанаар аймгийн ИТХ-ын Ээлжит 2 дугаар хуралдаанд оруулах асуудлыг хэлэлцэж, хоёр асуудлыг хойшлуулан 11 асуудлыг хурлын хуралдаанаар хэлэлцэхээр бэлтгэл хангасан гэж үзлээ.  

Зөвлөлийн хуралд Хүн амын бүлэг, нийгмийн салбарын хүний нөөцийн хөгжлийн хөтөлбөрийн төслийг аймгийн Засаг дарга Б.Зоригтбаяр танилцуулсан. Хүн амын бүлгүүдийн болон нийгмийн салбарын хүний нөөцийн хөгжлийг дэмжиж, нийгмийн үйлчилгээний чанарыг сайжруулах зорилгоор хэрэгжүүлэх тус хөтөлбөрийн хүрээнд 10 арга хэмжээ, 65 үйл ажиллагааг хэрэгжүүлэхээр төлөвлөөд байгаа аж.

Мөн Зөвлөлийн хурлаар Гамшгийн эрсдэлийг бууруулах орон нутгийн зөвлөл, болон ГХУСАЗСЗ-ийн бүрэлдэхүүнд холбогдох байгууллагаас ирүүлсэн зөвлөмжийн дагуу өөрчлөлт оруулах, Хот байгуулалт, барилга захиалагчийн алба УТҮГ-ын дүрэмд өөрчлөлт асуудлыг хэлэлцэж, хуралдаанаар хэлэлцүүлэхээр дэмжсэн юм.

Мөн

·         орон нутгийн өмчид эд хөрөнгө олж авах, бүртгэх, данснаас хасах, шилжүүлэх журам,

·         орон нутгийн өмчийн үндсэн хөрөнгийн дуудлага худалдааг зохион байгуулах журам,

·         орон нутгийн эд хөрөнгийг түрээслүүлэх журам,

·         өмч хамгаалах байнгын зөвлөлийн ажиллах журам,

·         орон нутгийн өмчийг эзэмшүүлэх гэрээний загвар, дүгнэх аргачлах батлах зэрэг журмуудыг шинэчлэн батлахаар төслийг боловсруулж, аймгийн ИТХ-ын Зөвлөлийн хуралд хэлэлцүүллээ.

Зөвлөлийн хуралд орон нутгийн өмчийн газраас орон нутгийн өмчийн нэгдсэн бүртгэлд бүртгэлтэй орон сууцны байрыг иргэдэд өмчлүүлэх жагсаалтыг  танилцуулсан бөгөөд ирэх 7 хоногт буюу энэ сарын 24-нд хуралдах аймгийн ИТХ-ын ээлжит 2 дугаар хуралдаанаар эдгээр асуудлыг хэлэлцүүлэхээр боллоо.

Эдгээр асуудлуудыг хурлын холбогдох хөгжлийн хороодоор хэлэлцүүлж, аймгийн ИТХ-ын хуралдаанд танилцуулахыг хурлын Зөвлөлөөс үүрэг болголоо.